کیا عامر خان، عمران خان سے کیا گیا وعدہ پورا کریں گے؟

بالی وڈ مسٹر پرفیکشنسٹ عامر خان نے ماضی میں عمران خان سے وعدہ کیا تھا کہ جب وہ انتخابات جیت جائیں گے تو وہ اس کا جشن پاکستان آکر منائیں گے۔

انتخابات 2013 سے قبل دورہ بھارت کے دوران عمران خان ایک تقریب میں شریک ہوئے جس میں بالی وڈ ستاروں سمیت کئی نامور شخصیات نے شرکت کی۔

اس موقع پر عمران خان سے سوال و جواب کے دوران بالی وڈ اداکار عامر خان چیئرمین تحریک انصاف کے جوابات سے بے حد متاثر ہوئے اور انہوں نے انہیں مصالحت پسند اور پختہ نظریے کا مالک قرار دیا۔

ان کا کہنا تھا کہ ’میری دعائیں ہیں کہ پاکستان میں ایک ایسی حکو مت آئے جو واقعی پاکستان کے مسائل حل کرسکے، جن کا ارادہ ہو کہ پاکستان میں خوشحالی آئے اور یہ نہ صرف پاکستان کے لیے اچھا ہوگا بلکہ ہمارے لیے بھی اچھا ہوگا‘۔

ان کا کہنا تھا کہ ’میرا دل کہتا ہے کہ آپ کامیاب ہوں گے کیوں کہ آپ کئی سالوں سے محنت کر رہے ہیں، جب آپ نے اپنی جدوجہد شروع کی تھی تو کئی چیلنجز کا سامنا تھا جس پر ڈٹے رہے‘۔

ران خان اور عامر خان کے درمیان یہ مکالمہ 2013 کے انتخابات سے قبل ہوا لیکن 2018 کے انتخابات میں عمران خان کی جماعت نے نہ صرف بڑی کامیابی حاصل کی بلکہ عمران خان ملک کے وزیراعظم بننے کی پوزیشن میں ہیں۔

سوشل میڈیا پر جہاں عمران خان کی جیت پر مبارکباد کا سلسلہ جاری ہے وہیں کچھ صارفین نے 5 سال قبل عامر خان کے وعدے کی ویڈیو شیئر کی اور مطالبہ کیا کہ اب وہ اپنا وعدہ پورا کریں۔

پاکستانی گلوکار و اداکار علی ظفر نے بھی مسٹر پرفیکشنسٹ کو ایک ٹوئٹ کے ذریعے کہا کہ اب وعدہ پورا کرنے کا وقت آگیا ہے۔

یاد رہے کہ گلوکار علی ظفر بھی اُس تقریب میں شریک تھے جس میں اداکار عامر خان نے عمران خان سے ان کی جیت کا جشن منانے پاکستان آنے کا وعدہ کیا تھا۔

عامر خان ہی نہیں بالی وڈ کے دبنگ سلمان خان اور کنگ شاہ رخ خان بھی عمران خان کے مداح ہیں اور ان کی کامیابی پر نیک خواہشات کا اظہار کیا ہے۔

from سچ ٹی وی اردو - تازہ ترین خبریں https://ift.tt/2Ajr097